Kooxda Liverpool ayaa u muuqata mid horumar weyn ka samaysay dadaallada ay ugu jirto saxiixa weeraryahanka reer Sweden ee Alexander Isak oo ka tirsan Newcastle United, iyadoo ay suuragal tahay in heshiis lala gaaro xagaagan.
Sida uu qoray wargeyska The Mirror, Newcastle United ayaa diyaar u ah inay dhageysato dalabaad ku saabsan Isak, maadaama ay bilaabeen qorshe lagu keeni karo badalkiisa, oo ay ka mid yihiin Goncalo Ramos (PSG) iyo Benjamin Sesko (RB Leipzig).
Isak, oo 25 jir ah, ayaa ka mid noqday weeraryahanada ugu gool dhalinta badan horyaalka tan iyo markii uu ku biiray Newcastle. Wuxuu ciyaaray 109 kulan tartamada oo dhan, isagoo dhaliyay 62 gool islamarkaana caawiyay 11 kale.
Heshiiskiisa hadda wuxuu ku eg yahay sanadka 2028, laakiin xiisaha Liverpool ayaa kusoo beegmaya xilli ay kooxda doonayso isbeddel cusub oo weerarka ah.
Maamulka Liverpool ayaa u arka Isak xalka ugu habboon ee lagu xoojin karo weerarka kooxda, iyadoo uu Darwin Núñez hoos u dhacay booskiisa kooxda koowaad kadib markii qaab ciyaareedkiisa uu hoos u dhacay tan iyo imaatinkii tababare Arne Slot.
Wararka ayaa sheegaya in Liverpool ay diyaar u tahay inay miiska saarto dalab weyn si ay u keento Isak, iyadoo laga yaabo in heshiiskan uu noqdo mid ka mid ah kuwa ugu waaweyn ee xagaagan.
Haddii wadahadalladu si habsami ah u socdaan, taageerayaasha Liverpool waxay filan karaan in Alexander Isak uu noqdo xiddiga cusub ee xiran doona funaanadda Casaanka ee garoonka Anfield.
