Wasiir ku-xigeenka Arrimaha Dibadda Yemen, Mustapha Noman, ayaa weerarkii gantaallada iyo diyaaradaha aan duuliyaha lahayn ee Xuutiyiintu ku qaadeen Garoonka Caalamiga ah ee Aden ku barbardhigay weerarro ay horey u fuliyeen ciidamada Israel.
Noman ayaa sheegay in markii Israel ay weerartay xarumo rayid ah oo ku yaalla Yemen, shacabka Yemen iyo guud ahaan Carabta ay si weyn u cambaareeyeen falalkaas, iyadoo aysan jirin cid taageertay ama ku faraxday. Wuxuu sheegay in Xuutiyiintu ay hadda ku dhaqmayaan qaab la mid ah weerarradaas.
“Markii Israel ay weerartay xarumaha rayidka ah ee Yemen, qof kasta oo Yemeni ah iyo Carabtii kale way cambaareeyeen falalkaas, mana jirin cid taageertay ama ku faraxday. Maanta, maleeshiyada Xuutiyiinta ayaa ku dayaneysa weerarradii hay’adda Israel,” ayuu yiri Noman.
Wasiir-ku-xigeenku wuxuu si kulul u cambaareeyay Xuutiyiinta, isagoo sheegay in weerarradooda ay bartilmaameedsanayaan kaabeyaasha iyo xarumaha ay shacabka Yemen dhiseen tobannaan sano.
“Habaar kasta oo dunidu leedahay kuma filna in lagu muujiyo carada iyo nacaybka loo qabo maleeshiyadan,” ayuu yiri.
Noman ayaa sidoo kale sheegay in Xuutiyiintu ay adeegsanayaan kaydka gantaallada iyo diyaaradaha aan duuliyaha lahayn si ay u burburiyaan waxa shacabka Yemen ay ku dhiseen dadaal muddo dheer socday.
Hadallada dowladda Yemen ayaa kusoo beegmaya xilli weerarrada Xuutiyiinta iyo jawaabaha militari ee dhinacyada kala duwan ay sii kordhinayaan xiisadda amni ee dalka, gaar ahaan goobaha muhiimka u ah gaadiidka iyo isku socodka shacabka.
