Sacuudi Carabiya ayaa aaminsan in Imaaraadka Carabta uu door ku lahaa fududeynta aqoonsigii Israel ay Somaliland siisay, iyadoo arrintaas lala xiriiriyay in Israel ay marin amni ka hesho magaalada Berbera, sida lagu sheegay warbixin cusub oo uu soo saaray Golaha Yurub ee Xiriirka Dibadda (ECFR).
Warbixinta ayaa sheegtay in saraakiil Sacuudi ah ay rumeysan yihiin in Abu Dhabi uu fududeeyay xiriirka Israel iyo Somaliland, iyadoo Berbera ay qayb ka noqon karto danaha amni ee Israel. Xogtan waxaa ECFR ka soo xigatay sarkaal sare oo Sacuudi ah oo qoraaga warbixinta kula hadlay telefoon, balse magaca sarkaalka lama shaacin.
ECFR waxay caddeysay inaysan haynin dokumentiyo madax-bannaan oo xaqiijinaya in aqoonsiga Somaliland si rasmi ah loogu beddelay marin amni oo Israel laga siiyay Berbera. Sidaas darteed, arrintan waxay weli ku kooban tahay qiimeyn ay sameeyeen saraakiil Sacuudi ah.
Warbixintu waxay sidoo kale xustay danaha Imaaraadka ee Berbera, halkaas oo shirkadda DP World ay maamusho dekedda, iyo qorshaha ballaaran ee Abu Dhabi uu ku doonayo inuu saameyn uga yeesho dekedaha iyo marinnada ganacsi ee Badda Cas iyo Geeska Afrika.
Soomaaliya ayaa si adag uga hortimid aqoonsiga Israel ee Somaliland, iyadoo ku tilmaantay xadgudub ka dhan ah madax-bannaanida, midnimada iyo wadajirka dhuleed ee Soomaaliya. Dowladda Soomaaliya ayaa sidoo kale qaaday tallaabooyin ka dhan ah heshiisyadii ay la lahayd Imaaraadka.
Warbixinta ECFR, oo la daabacay 21-kii September, ayaa arrintan ku xirtay tartanka sii xoogeysanaya ee u dhexeeya Sacuudi Carabiya iyo Imaaraadka Carabta, gaar ahaan saameynta ay ku leeyihiin Yemen, Badda Cas iyo Geeska Afrika.
